ERAKUSKETA: 2019ko Praktika Artistikoen Egonaldien programa. Alina Aguila eta Tana Garrido

Alina Aguila eta Tana Garrido
2019ko Praktika Artistikoen Egonaldien programa
Azkuna Zentroa
2019ko Praktika Artistikoen Egonaldien programako Tana Garrido (1989) eta Alina Aguila (Kuba, 1987) artista egoiliarrek Habanako Estudio Carlos Garaicoaren 'Artista x Artista' programarekin lankidetzan Azkuna Zentroko egonaldian gauzatu dituzten proiektuen emaitza aurkeztuko dute, otsailaren 13tik apirilaren 26ra arte.

Alina Aguilaren lanean, objektuaren xehetasunik txikienak eta haren pertzepzioak eragindako kezka eta manipulazioa agertzen dira, eta indibiduo-materia-espazioen arteko harremana desitxuratu, eta eskalak -fisikoak eta psikologikoak- aldatzen dira.

Artistak azaltzen duenez, «arte minimalak keinuen adierazpen subjektibo guztiak kentzen zizkion objektuari. Nire lanean, inbertsio-operazio bat egiten dut, egitura minimal baten azpian; ikusleak zoom egiten du imajinario indibidualeko gune arkeologikoetan, non ezinbestekoa den oroitzapenera jotzea. Espazio mentalak pieza bakoitzean maketatutako espazio fisikoa gainditzen du, materialen eta amets-, eldarnio- eta haluzinazio-prozesuen hizketaldi batez horniturik».

Alina Aguilarekin harremanetan, Tana Garrido artistak Kubako egungo etxeko espazioaren ikus-entzunezko behatoki bat jarriko du ikusgai du, instalazio-formatuan. Garridok euskal sorburuko emakume kubatarren lekukotasuna jaso du, generoaz, lurraldeaz eta oroitzapenaz hausnartzeko.

Sortzaileak azaltzen duenez: «prozesuan hainbat aldi izan dira: ikerketaren lehen aldia hemen izan da, Euskal Herrian; bigarrena, Habanan, ingurunearekin eta pertsonekin kontaktuan, eta emakume horiekin guztiekin harremanetan; eta hirugarrena, aurreko guztia bideoan eta audioan erregistratzea eta gauzatzea izan da. Azkenik, egonaldiaren azken aldi honetan, Habanan bizi izandako guztia Euskal Herriko ingurunearekin jarri nahi dut harremanetan».

Tana Garridok (1989) era berean lantzen ditu esparru dokumentala, arte garaikidea, saiakera bisuala edota dinamizazio kulturala. Haren piezak arte garaikideko zentro askotan egon dira ikusgai, besteak beste, hauetan: Sant Andreu Contemporani (Bartzelona), Arts Santa Mònica (Bartzelona). Horrez gain, Márgenes (Madril) eta Atlanticdoc (Uruguai) zinema-jaialdietan erakutsi da. Programatzailea eta Emakumeek egindako Film Laburren BENDITA TÚ Zinemaldiaren sortzailekidea izateaz gain, SC kolektiboko kidea da; eta, hor, ikus-entzunezkoen arloko esperimentazioa eta partekatutako materialez egindako lana jorratzen ditu. Edinburgon egiten den Iberoamerikako Zinema Dokumentaleko IBERODOCS Jaialdiko programatzailea izan da lehengo urtera arte, eta, gaur egun, film luzerako lehen gidoia idazten ari da.

Alina Aguila Ferrer (1987). Villa Clarako artista honek (Kuba) Arte Plastikoen Leopoldo Romañach Akademia Profesionalean ikasi zuen (Villa Clara, 2008), eta, gero, Arteen Goi-mailako Institutuan (ISA) jarraitu zuen (Habana, 2013). Egin dituen erakusketen artean, hauek nabarmentzen dira: Estación Central. Galería Cristo Salvador (Habana, 2011), Marcha sobre las uvas. Centro Wilfredo Lam (Habana, 2013), eta El jardín de los suecos (Orestes Hernández artistarekin jarritako erakusketa bipertsonala), Galerie knoerle & baettig, (Winterthur, Suitza, 2017).

Fundación Banco Sabadellek egonaldi artistikoen programa babesten du, artea eta kultura sustatzeko eta hedatzeko duen programaren barruan.
Inaugurazioa: 2020/02/13
Hasten da: 2020/02/13
Bukatzen du: 2020/04/26
Ordutegia: Asteartetik ostiralera 16:30etatik 20:30etara
Kokapena: Arrikibar plaza, 4

Date

13/02/2020 - 26/04/2020

Time

16:30 - 18:30

Location

Azkuna Zentroa
Arriquíbar Plaza, 4, 48010 Bilbo, Bizkaia
Category
No Comments

Sorry, the comment form is closed at this time.